jueves, 3 de mayo de 2018

Día les Lletres Asturianes


Y siguimos coles visites a la nuesa escuelina para cuntar y cuntar y requete cuntar. Esta vegada, al rodiu'l Día del Llibru y la Selmana de les Lletres Asturianes, tuvimos un cuntacuentos n'asturianu mui especial. Perafadizu pa echar un pigacín a la hora de la siestina ¡sh, sh, sh!... si, si, mui mui tranquilín, pa tar seliquín.....zzzzzz.

Xesús González Rato, escritor y traductor, compartió la so llectura de "El tractorín que quier dormir" con tola reciella d'El Rubín. Xunto a otros dos cuentos entitulaos "La elefantina que quier dormir" y "El coneyín que quier dormir", editaos n'Asturies pola editorial Trabe, axunten la torna asturiana del métodu encamentáu por Carl Johan Forssén Ehrlin, sicológu suecu, que fixo estos cuentos col envís de facer una llectura llenta y relaxante pa los pequeñines nel intre de dir achucase. La llectura d'estos cuentiquinos, encamiéntase en voz baxa, con aiciones propies del suañu:  xuxuriar, bocexar, etc, Un conxuntu de téuniques de relaxación que sirven a  les families como una  ferramienta amañosa na hora'l suañu.

¿Quies saber si ésto furrula? Pues nun hai cosa meyor que probalo a facer. Asina que nun se t'escaeza. Aprovecha güei, vienres 4 mayu, que ye'l Día les Lletres Asturianes, nesta 39 Selmana de les Lletres Asturianes, que fai homenaxe al papel fonderu de la lliteratura infantil y xuvenil. Pásate pela llibrería del to barriu, onde atoparás descuentos y un regalín perguapu poles tos merques. Atoparás  cuentinos tan prestosos como lo que nos traxo Xesús, y otros tantos más que son perafayadizos pa tolos pequeñinos.

Da-y les gracies Xesús por compartir sus llecturas con toles neñes y neños d'El Rubín. Y milenta gracies tamién a Esther de Trabe pola so collaboración y participación nesta escuelina de cuentu.

¡A esfrutar coles llectures! 
¡Feliz día les Lletres Asturianes 2018!


No hay comentarios:

Publicar un comentario